رمضان كريم

انا عارف ان محدش بقى يدخل هنا غالبا

بس رمضان كريم لكل اصدقائى و كل يوم و انتم الى الله اقرب

ادعولى بعودة جديدة هنا

ان تضحك و عينك تملأها الدموع

كنت بكلم واحد صاحبى  زهقان ,,بحاول افك عنه يعنى,,و و انا بكلمه عدت عليا لحظة كده,,و مش عارف ليه قلتله ان انا زهقان اكتر منه بس مش عايز اخد بالى,,و حاسس انى لوحدى,,بس عمال اكلم ده و دى عالنت و فى التليفون و كل شوية انزل الشارع و اعدى على القهوة ...عايز افضل مع ناس وبس..عشان ماخدشى بالى انى لوحدى او ماخدشى بالى مين اللى سايبنى من اللى بيسال عنى...
والله مانا عارف دى اوهام والا حقيقة

عمال اسمع فى اغانى الرتم بتاعها هادى,,او حزين..مش عارف ايه اللى بيتقال مع انه عربى...بس حاسسها اغانى حزينة و كلها شرود و اهات,,,ركزت فى الكلام لقيتها اغانى انا عارفها...ماهى دى البلاى لست بتاعتى و الاغانى اللى انا عارفها اصلا..لقيت الكلام مش زى مانا فاكره...بس انا سامعه حزين و حاسس انه بيعبر عن بعاد و عن وحدة
يمكن انا لوحدى...او عارف انى هابقى لوحدى بعد شوية...
مع انى عندى صحاب يسدوا عين الشمس...بعشقهم كلهم و بيحبونى...
مع انى الحمد لله عندى كل حاجة و مش ناقصنى حاجة...
مع انى غاوى ضحك و باضحك و بضحك مع الناس كلها...
الا انى لما بقعد مع نفسى و مافيش حد معايا مش بحس غير بحضنى لنفسى....
باخد نفس طوييييل و اطلعه بالراحة و اتعجب على حالى
و الاقى الحاجة قصادى فى عينى مزغللة ثانيتين و بعدها الاقى كام  نقطة ميه على وشى و ايدى..
ليه ..ليه و مافيش حاجة ناقصة فى حياتى...ليه الدموع دى بتنزل من عينى...
و اخد نفس طويل تانى و اتعجب على حالى و اريح فى القعدة على الكرسى و اتجعص كده...
و ابتسم او اضحك ضحكة خفيفة عالماشى و اقوم اعمل اى حاجة او اكلم حد عشان ماخدشى بالى من حالى...او ادخل انام و ابل المخده.. و ربنا كريم

ربنا يرضى عنا و يتوب علينا...
يا ربى لك الحمد كما ينبغى لجلال وجهك و عظيم سلطانك
اللهم صلى على سيدنا محمد و على  آل سيدنا محمد كما صليت على يسدنا ابراهيم و على آل سيدنا ابراهيم
يا ارحم الراحمين برحمتك استغيث
يا ارحم الراحمين برحمتك استغيث
يا ارحم الراحمين برحمتك استغيث
اللهم انت الغنى و نحن الفقراء اليك,,اللهم انتى القوى و نحن الضعفاء اليك,,,اللهم انت العزيز و نحن الاذلاء اليك
ياصاحبي عند

شدتي ؛ يامؤنسي في وحدتي ؛ و ياحافظي عند غربتي ؛ يا ولي في نعمتي ؛ وياكاشف كربتي ؛ وياسامع دعوتي ؛ ويا راحم عبرتي ؛ ويامقيل عثرتي ؛ ياإلهي بالتحقيق ؛ يا ركني الوثيق ؛ يارجائي في الضيق ؛ يامولاي الشفيق ؛ يارب البيت العتيق ؛ أخرجني من حلق الضيق إلى سعة الطريق ؛ وفرج من عندك قريب وثيق ؛ واكشف عني كل شدة وضيق ؛واكفني ما أطيق وما لا أطيق ؛ اللهم فرج عني كل هم وكرب ؛ وأخرجني من كل غم وحزن ؛ يافارج الهم ؛ وياكاشف الغم ؛ ويامنزل القطر ؛ ويامجيب دعوة المضطر ؛يارحمن
الدنيا والآخرة ورحيمهماا ؛ صل على خيرتك محمد النبي ؛ وعلى آله الطيبين الطاهرين ؛ وفرج عني ماضاق به صدري ؛ وعيل معهُ صبري ؛ وقلت فيه حيلتي ؛ وضعُفت لهُ قوتي ياكاشف كل ضر وبلية ؛ وياعالم كل سر وخفية ؛ يا أرحم الراحمين ؛ وأفوضُ أمري إلى الله

اللهم انى اسالك رضاك و الجنة و اعوذ بك من سخطك و النار
سبحانك اللهم لا اله الا انت سبحانك انى كنت من الظالمين
ربنا اغفر لنا ولا تؤاخذنا ان نسينا او اخطئنا
اللهم دبر لى امرى فانى لا احسن التدبير
اللهم اعزنى بعزتك وامدنى بقوتك و ارحمنى برحمتك فانك ارحم الراحمين

باعترف.....شالوا أنا من جوايا

انا باعترف انهم من احساسى جردونى
و ان لون الدم عندى بقى بس لون لهدومى
و ان احساسى بانسان بعيد عن عينى بقى بعيد
و لو يوم من حزن أمة دمعت يبقى ده شئ جديد

بعترف انهم خلونى فالمشاعر جامد
و انى بقيت باكبر و اقول انا كدة واد جامد
و ان المجازر عندى بقت خلاص عادى
ماهو كل يوم عادى و كل دمعة و كل عرض بينتهك عادى

بعترف انهم خلونى احس ان مافيش امل
و انى من غلبى عندى صبر اكتر من الجمل
و انى عن حقى ساكت و ماشى جنب الحيطة
ماهى شجاعتى و انسانيتى بقم صورة على حيطة

لكنى باعترف ان جوايا لسه فى انسان
فى الجدعنة جدع و فى حقوا مش جبان
انا بس بسأل نفسى امتى البتاع ده يبان
والا هاتفضل خايف لحد مايفوت الاوان

الفن الاصيل و الهم التقيل

امبارح كنت باتفرج على التلفزيون و بحل سودوكو...قلت اسمع اغانى من على روتانا طرب زمان فيها فيروز دلوقتى...حاجة جامدة يعنى و سالتك حبيبى لوين رايحين....كان فيديو كليب او اغنية مصورة بمعنى اصح...الكاميرا مانزلتشى من على وشها,, بالكتيير جابو كتفها,,عحبنى اوى الاحترام اللى كان فيهم,,على عكس ميلودى بقى و مزيكا,,لما نشوف عليهم ايه....يانهااااااار...نزلوا بالكاميرا لتحت ...فيروز مش ميلودى,,لابسة بلوزة زرقا و جونلة زرقا...مش باين منها غير ايديها ووشها...و ربطة شعرها بفيونكتين...اه وربنا...لا لا لا ,,,انا لازم اشوف ميلودى فيها ايه ,,ده احنا هانضحك ضوحك....يا حظى الاسود...مش كدب ولا فبركة بس لاقيت الست هيفا (وصفا لا اسماً) و رجب حوش صاحبك...هى ايه بقى فكرة الكليب ده اصلا يعنى ؟!و عايزين يوصلونا لايه منه..فضلت افكر...بس مافيش اى حاجة..(لو حد يعرف يقولى),,قلبت عشان قرفت,,,لقيت مسيو سعد النونة الصغنن كوتومونس بيقول مبروك و فى فرح و عيال صغيرة بيرقصوا بشكل رائع(انا مصور عيال من دول فى فرح فى الشارع نفس الاسلوب..هابقى احطهم هنا )...
مى كساب دى بقى ...زى العسل بجد تحفة البنت دى
و امينة شلباية طيبة و حنينة موزعة نمرتها فى الاعلانات عشان اللى بشرتها تعبانة او حاسة انها جربانة او عندها هلالات سودة او وزنها مالى الاوضة او شعرها بيقع و هاتقرع باذن واحد احد تتصل بيها
مزيكا زوووم ...عالمكشوووووف...مكشووف اوى يعنى..ناس واضحين و صرحا
البتاع اللى بيخنقنى بقى عداد الحب ده....ده انا ممكن ابعت اسمى و اسم كائن فضائى و هايطلع نتيجة برضوا,,,,,غبااااااااء...علاقة خيالية..علاقة متخبطة..حب و انسجام..صداقة ناجحة.....طب فى واحد بعت الاسم (انا....زوجتى) النتيجة علاقة مقطوعة,,يروح يطلقها,.,.,ميييين الحميييييير اللى بيبعتوا دوول...ده غباء ولا غباء الأبل و معييز الجبل
انا اكتشفت انى مش عارف ام كلثوم شكلها ايه...عمرى ماخدت بالى من تفاصيلها....مش عارف ليه !!ممكن عشان باركز مع صوتها او الصوت هو اللى بيحبرك انك تركز معاه و يشغلك اوى عن اى حاجة...او يمكن المخرج كان محترم...او الناس (محترمين و غير...)ماكنتشى ساعتها بتعوز من ام كلثوم غير ان هما يشوفوها و هى بتغنى و هى ماسكة المنديل.
طبعا دلوقتى الوضع اختلف تماما و بقى فى متطلبات اخرى لنجاح المغنى ..بسبب اختلافات(محورية و جوهرية) كتيرة اوى...فى الصوت و فى المخرج و فى اللى الناس عايزاه من المغنى...و يبقى يوم السعد و الهنى لما الواحد يقفش على موبايل صاحبه فى القهوة مشهد سيكو سيكو لمغنية او حتى واحدة شبهها
هو ده كده من الناس؟؟والا من اللى بيغنوا...يعنى لو ام كلثوم او فيروز عايشين دلوقتى...كان ممكن نلاقى واحد بيقول لصاحبه ماعندكشى مشهد لام كلثوم او صورة من اياهم لفيروز...الله اعلم...
ياااااااااااااااااااااه...اخيرا...حليتها...خلصت السودوكوهايا...احمدك يارب

حياتى

 مافيش اى صورة تعبر عن اللى هنا مهما كانت معبرة....

اصحابى اللى بعتبرهم اهلى هما دول بجد اللى طلعت بيهم من الدنيا و هما اكبر نجاح فى حياتى
انا هاكتب اللى هايجى فى دماغى دلوقتى و ماحدش يزعل لو ماكتبتوش لان اكيد فى سبب و اكيد هو عارف انا بحبه اد ايه
------------------------
مصطفى شعبان...طول عمرنا سوى واكلين شاربين قايمين فى مكان واحد...لما باكون معاه (خصوصا عنده فى اوضته) ممكن اتقلب قرد ولا يشتكى منى,,,باطلع كل الهبل و العبط اللى فيا عنده,,كل التخلف العقلى بيطلع عليه غالبا لوحده...ولا بيشتكى...اقول عليه جدع و صاحب كلمه و راجل راجل لابعد حدود...لما بيهيس بيكون وهمى  و كل لما اكون فاضى و عايز اقضى وقت فى اللذيذ اكلمه فى التليفون و عمره ما رد عليا غير بـ"تعالى فى اى وقت"... مبهدلنى بلاى ستيشن على طول و عمره ما جه عليا...و لو فضلت اكتب عنه مش هاخلص..يا جدعان ده مصطفى طول عمرى معاه...فاهمين يعنى ايه مصطفى...اخويا اوى
------------------------
محمود اشرف.....راجل قليلة عليه...موهوب فى جميع المجالات شعر و فن و مقالات ...معظم الوقت هو فى مشكلة...و طول الوقت بيضحكك و يخليك فرحان...مبادئ بتتنفذ من غير ماتتقال فى كل المواقف و الظروف الصعبة...اخويا و كل رمضان سوا مع بعض....
------------------------
أحمد عادل محمد سليمان حجازى(و شهرته النوتى)....ياااااااااااااااه...انا فاكر البدلة ام سديرى يا واد يا نوتى ....سليمان ده اطيب خلق الله اللى عرفتها..طيب اوى...طيب طيابة ملهاش اخر بجد...ممكن افضل اكتب طيب للاخر من غير ماخلص...المطرب بتاعنا,,,كل المدرسة قالت انه صوته حلو ماعادا انا و مصطفى...بقى سليمان صوته حلو,,خلاص بقى يا مصطفى الناس كلها قالت كده...طول عمره مستحمل رخامتى و عمره ماندل معايا, حتى الاغانى اللى بكتبها بيغنيها مع ان نصها مش حلو و غنى احلى كام سطر كتبتهم فى حياتى و عبر عن اللى جوايا,,,عاطفى فحت و رومانسى بحمورية ...اخويا...اخويا...اخويا....و مصطفى مقطعه بلاى ستيشن,,انما لما بلعب انا و هو ضد مصطفى بنكسبه (ساعات) انه احمد عادل سليمان النوتى قبطان اعالى البحار...انه نوتى صديقى جدا
------------------------
سامح محمد صالح...ساموحتى...يخرب بيت جمال ضحكتك و المواقف اللى عيشناها سوا,,,سامح ده حالة خاصة و ماقابلتش زي انا و هو فى الصحاب او الاخوات او اى علاقة تربط شخصين ببعض...من اولى ثانوى و هو فى مدرسة تانية و بنحب بعض...دخل جامعة غير جامعتى و بنحب بعض...سافر ماليزيا و مش باشوفه غير 6 مرات كل سنة و بنموووووووت فى بعض.....انا مش هاتكلم على اننا فاهمين بعض و الكلام ده كله...احنا لما صعينا صعينا سوا و لما صعينا عالاخر صعينا سوا عالاخر يعنى ده اللى رحت معاه فى مكان بعييييييييييد عن المدرسة عشان نشرب سجاير و بعدها نجيب سكوتش منت و نسفه و نفرك ايدينا بورق الشجر,,هى مش السجاير بس,,,هو الاجرام كله مع بعض ايام طلعت حرب و التحرير و المعادى...و ده اللى سافرت معاه مصر كلها من الاقصر و اسوان الى بورسعيد الى الغردقة و شرم الشيخ ...يعنى شفنا الدنيا سوا ...مافيش مرة فضلنا متخانقين اكتر من نص ساعة حتى لو بالضرب و التعوير و تكسير النضارات نص ساعة و بس.....ده اللى كل مامشى فى السيدة زينب افتكره...ده اللى الناس لما بتحكى مواقفها لازم سيرته تيجى و احكى عليه...ده اللى هو بس اللى عارف انا بحبه قد ايه و محدش تانى هايفهم .....ده سامح محمد صالح....ده  حياتى
------------------------
محمد باسم حافظ...اسمه محمد و كل الخلق بتقوله يا (برضه) اه اسمه برضه....محفور فى عقلى ذكريات المذاكرة معاه و طنط مامته اللى هى امى انا كمان بتذاكرلنا كل المواد...ليلة امتحان الرياضة فى خمسة ابتدائى...النادى و التايكوندو سوا...يمكن ماخرجناش كتير سوا ولا رحنا سينما مع بعض الا مرة واحدة بس فى فيلم عبود عالحدود...انما فى سر ارتباط رهيب بينى و بينه....يمكن عشان اول عمل اجرامى فى حياتنا كان سوا,,فى كى جى وان..اه والله من وانا صغير...قلبنا الشنط بتاعت الفصل كله شنطه شنطه و القسمة بالنص و بالعدل...يمكن عشان من واحنا صغيرين اهلنا فهمونا اننا اخوات...والا عشان كنا بنقول لبعض انا هاخطفك و خليك عندى فى البيت ....هو دلوقتى فى البحرية,,,مش باشوفه فى معظم الاجازات لانه بيكون محبوس غالبا....انما لما بكلم طنط بتقولى هايموت و يشوفكم و يارب ينزل المرة دى عشان التجمع الكبييير.....يارب....محمد باسم...برضه...اخويا طوال العمر
------------------------
شركس...محمد رضا شركس....اعلى صوت سمعته فى حياتى....طيب اوى...عارفين,,اهه ده بقى اللى ممكن اقول عليه انه اطيب من النوتى...ده المصدر بتاع الطيبة,,,او اقول عليه غلبان احسن (بالمعنى الكويس طبعا)اول مافتكره اسمع صوته و هو بيقول "ايه يا سو"..حبيبى والله يا شيكو
------------------------
الناس اللى فوق دول  كلنا نعتبر ساكنين فى حتة واحدة و من كى جى مع بعض و ان شاء الله عمرنا كله مع بعض
------------------------
مصطفى الطيار...تيتو...الوحيد اللى بتكلم قد مانا باتكلم و يرغى اد مانا ارغى...دماغ عاليا و وجهة نظر فى كل حاجة و فاهم اوى نظرية النسبية فى التعامل زى مانا فاهمها,,,لما باتخنق اوى بانزل اتمشى لوحدى,,,بس لو اتخنقت اوى اوى اتصل بيه انزلى يا طيار...عشرة الصبح واحدة بالليل مش بتفرق ..انت فين و يجينى عدل...لما نحب نهيص نروح بيت طيار... و لو عايزين نتمشى لازم فيها طيار...معانا فلوس مش معانا مش فارقه ,,,يمكن اكتر واحد بينصحنى اليومين دول و اكتر واحد اخد رأيه...حتى لو معملتش بيه لازم لازم اعرف رأيه ايه...مرة واحدة بس اتشاكلنا و قفلنا التليفون...ماكملناش خمس دقايق و اتصل بيا و قلى ايوة يا حمار و عدناها ببساطة...ممكن صوتنا يتنبح مع بعض و احنا بتناقش..لو حتى اكتر من يومين المهم نوصل لحل...طيار معرفة وقت 3 سنين و عشرة العمر كله...طيار ده اخويا بجد و حبيبى
====================
اسلام عيد....ايسو يعنى....مع ان البداية كانت مش طايقنى ولا انا فاهمه...انما درجة الحب بينا غبية,,,مش عارف ليه بس فجأة اسلام بقى اخويا و انا اخو اسلام امتى و ازاى و ليه ماعرفشى...انا و هو مجتمعين فى الرأى على حاجات كتير اوى....فى الوقت اللى حصلتلى فيه اكبر مشاكل حياتى كلها,,,
مازهقشى من المناقشة و المناقرة بحثا عن حل و قرارات مصيرية ليا لمدة اربع ايام لدرجة
 انه فى الاخر كان هاينام منى على  الرصيف
اسلام اللى  ده راجل مع انه فى ناس فاهماه غلط ,,,بس راجل و فى موقف كل مافتكره و تصرف كل مافتكره اقول ده راجل بجد....اسلام اخويا و حبيبى
====================
محمد محروس....بيحبنى بغباء...ده اللى انا بحسه لما بيجى و يسلم عليا و ينكشنى...ليه راى جامد جدا...طيووووووب..شفته طيوب دى اهو ده طيوب و حبوب....مش هاقول كلام كتير غير انى اقول انه لما جه فى دماغى قلت لازم اكتب اسمه هنا مع دول لانه منهم.و معاهم..فى قلبى
====================
مصطفى سويلم...مش شوية مشاكل اللى تبعدنا عن بعض...ده انا دخلت بيته و دخل بيتى و كلنا مع بعض عيش و جبنة و مكرونة و دره...من كتر الجوع كلنا دره بالقلاحه بتاعته...حد يكون مش لاقى ياكل و مستمتع عشان احنا مع بعض...مش لاقين ناكل فعلا و مستمتعين و لمدة 3 ايام لاطعام و اخر مزاج...سويلم مع هؤلاء
====================
مصطفى تكرورى ....على قد ما بنبعد على قد مانقرب...الواد ده قلبه ابيض فحت و صاحب اوى...بس الدنيا عامله معاه الواجب,,,بس انا متأكد ان شاء الله انه هاينجح و يوصل لانى مؤمن بيه
====================
معاذ عبدالناصر.....اخويا و حبيبى...بعشق نكته...بجد بعشقها...بنقلش سوا انا و هو لما نشبع...من 3 سنين نادانى و قالى يا سبايك و دلوقتى كل الولاد فى الكلية بيقولوا نفس الكلمة لما ينادونى...اليوم من غير ماشوف معاذ فيه حاجة ناقصة...مش هاتكلم عن احترامه و جدعنته و كده,,,لانهم مش محتاجين كلام...ليلة امتحان المكيانيكا (للمرة التانية) اتنين بيموتوا من التعب و مش مذاكرين و ينزلوا يلفوا فى الشارع و يقضوها...فى حياة اكتر من كده...معاذ بجد الوحيد اللى بسيبه يهزر معايا بايده براحته عالاخر و بستمتع بالهزار ده
====================
معتز حمدى....لسه مالقتشى زيك يا مييز فالقسم العفش ده...يعنى لولا انه مستقبل كان سقط السنة دى عشان يكون معايا...اكتر واحد خايف على مصلحتى فعلا و ليس قولا...السنة اللى فاتت ذاكرت فى بيته اكتر من ما ذاكرت فى بيته...ماحزنتش لما عدت السنة على حاجة زى بعدى عنه...انا بعانى من غير معتز معايا...اتمشينا سوا لما ورمت رجلينا و ياما بدانى على مصلحته ...و ايام النكسة بتاعتى كان من اكتر الناس اللى ساندتنى...معتز حمدى...افتقد اوقاتى معاك
====================
منة الله مصطفى....منة...غير انها اختى الصغيرة و صديقة وفية جدا,,فهى زى بنتى تمام زى مابقولها دايما...سنة كاملة فى اعدادى هندسة بنعانى سوا و بنحضر محاضرات و سكاشن سوا و نمتحن سوا و ناكل فى ميدو سوا ..غير حبيبتنا كلنا و هى عربيتها....كل ده بالاضافة لحاجات كتير جدا تخلينى اقول انها  لاتوصف الا بانها اختى طول عمرى ...انا مش عارف اقول عليها ايه ..بس اكيد  هى عارفة يعنى... و اعيش و اشوفها عروسة كده  مع واحد عالفرازة
====================
داليا...مع ان البداية كانت مش مقبول...انما دلوقتى ماينفعشى اتكلم...هاقول ايه يعنى,,,اصلها داليا يا جدعان....
بجد بجد بجد اختى اوىىىىى
...كفاية انك تتكلم معاها و اليوم يتعدل حاله...هى اللى بتجمعنا...ماما داليا....مع انها بتاكل كل الصور اللى بنتصورها...انما دايما اقول...من حبه ربه ..حبب فيه خلقه
====================
يارا...كتبت و مسحت و مافيش كلام ينفع هنا
====================
منة الله محى...ادع سلام للبنات الجدعان جدا بصورة بشعة و شنيعة...و اجدع مشجعة للاهلى...و اجدع بنت و اجدع بنت و اجدع بنت...دى مش غلطة مطبعية ..دى اجدع بنت للمرة الرابعة...مافييييش اى فرق....كفاية انه مافيش مسدج غير و قالت فيها "انا لو ليا اخ......"
يعنى هاقول ايه...دى منزة...
====================
سلمى عماد....اكتر واحدة عملت فيها مقالب لحد دلوقتى....اختى...انا ابصملها بالعشرة فى اى لبس و هدوم و راى يختص بالذوق...هى الذوق الرفيع...و انضف فوناتكس فى الدنيا...و متواضعة اوى و زى مابقولها ...بنت ناس اوى...سلمة و اخوها سامح سامحون و مامتهم لازم اسال عنهم اسبوعيا على الاقل...لازم الواحد يسال عن اهله برضه
====================
يوليانة امين...صديقة فريدة من نوعها بجد....كفاية انها كانت عارفة عنى كل البلاوى اللى عملتها فى دنيتى من و انا صغير و عمرها ماطلعت منهم كلمة..ولما كانت تقول كانت تقول "انتوا متعرفوش معتز كان ازاى و دلوقتى بقى ازاى و لو قلتلكم مش هاتصدقونى"
يوليانة بجد صديقة فريدة من نوعها...كانت من القلة القليلة اللى بتخلينى اتعامل بتحضر فى عصر الاضمحلال خاصتى...مافيش عيد الا و بتتصل بيا ...اول مخلوق يتصل هيا دايما سباقة بالخير....هى يوليانة امين صديقة لنا جميعا فريدة من نوعها
---------------------------------------------------------------------------------------------
====================
انا حاسس انى كاتب اسامى اقل من اللى فى قلبى  
اكيد انا نسيت ناس....بس دول اللى جم فى دماغى دلوقتى و الباقى عارفين هما ايه و مش هايتضايقوا لو ماكتبتش اسمهم....عشان فى قلبى اللى اسمه مكتوب بالرصاص و ممكن يتمسح عارف نفسه و اللى اسمه مكتوب بالجاف و الحبر و استحالة يتمسح عارف برضه انه هو حالة خاصة بالنسبة ليا
----------------------------
الاسامى اكيد مش مترتبة  لانهم عندى مش مترتبين...كلهم لوكشة واحدة كده...فيهم حالات خاصة انما  الفرق بينهم هو صفر
----------------------------
الناس دى كلها فيهم حاجات مشتركة غير انهم يعرفوا بعض...بحبهم فى الله كلهم و مش عايز منهم غير انهما يكونوا فى حياتى....بس كلهم حنينين اوى اوى,,,طيبين جدا,,,صاقدين ,,,رومانسين و عاطفين اوى بس فيهم اللى مش باين عليه,,,,,جدعاااااااااااااااااااااااااااااااااااااااااااان من هنا لبكرة.....اصحاب يتقال فعلا عليهم كلمة صديق مش كفاية و اخ برضه مش كفاية.....كلنا كده بنحب بعض بغباء مع تفاوت درجات الغباء....مافيهومشى واحد لو حسيت انه متضايق او مخنوق ممكن تعدى بالساهل....حبايبى اوى و بعزهم اوى اوى....
مش عارف ايه تانى ممكن يتقال...بس اللى بيحس و عنده شعور اكيد عرف انا بحبهم اد ايه و هما ايه.....هما حياتى...هما اهلى و صحابى و بيتى...هما حياتى

ماليش نفس اكتب... يمكن من الزهق,,عندى امتحان بكرة و ربنا يستر..معرفتش انام شوية عشان اعرف اسهر اذاكر و مانمتش و ادينى قاعد مش باذاكر....يا حول الله يا رب,,مانجيلكوش فى حاجة وحشة ابداً....العملية كلها انى بقيت حاسس ان ناس كتير حوليا بقت فاهمانى غلط ..واخدة عنى فكرة مش انا....

المهم انا قررت انى ابطل ارغى كتير و اتكلم كتير,,الا مع اهلى..مش بمعنى ابويا و امى و اخواتى,,,اهلى اللى هما اصحابى...بجد بجد ربنا يخليهم ليا...انا مخنوق اوى و ممكن تكون عينى فيها دموع دلوقتى,,بس ده من احساس ان انا مش مقرى صح و انى حاسس انى اتظلمت شوية,,,يمكن بقى منظرى فى حاجة غلط(مع انى والله باهتم بيه) انما مافيش غير صحابى دول اللى من اول مرة اتكلمت معاهم قالوا ده كويس,,,معظم الناس التانية قالوا فى وشى او لصحابى او من ورى ضهرى انى جايز اكون عبيط او اهبل...على الاقل بينهم و بين نفسهم....مع انه مش شرط يعنى,,,انما ارجع و اقول ان الواحد مالوش غير اهله ...هما بيته و اوضته و سريره و بطانيته و الدبدوب بتاعه....و ربنا مايحوجكم لبطاطين من بره

untitled

When i put my head on my pelow
i think of you
when i sleep at night  i dream of you
when i wake up at the morning i remember you
when i wonder in the streets i think of you
when i'm with you and you dont talk i miss you
i think my life just goes around you
i guss i'm totaly in you


I took a deep breath
I held it inside me
I closed my eyes and imagined you....my heart beated faster
I can only see you now,,,,
OMG....!!! you are just like an angel
i miss You....

ضاقت بيك...حالة جامدة

ضاقت بيك...كلمات معبرة اوى ...
بجد يعنى المؤلف عبر عن حالة صعبة اوى و اختار كلمات معبرة اوى


كل مره بكون معاك عالزمن
وأما الزمن يضحكلك بكون وياك

على طول تبعنى من غير تمن
وأنا برضه بدعى ربنا معاك

ضاقت بيك
تبقى عايزنى أكون حواليك
ضحكت ليك
أخلاصى يكون حمل عليك
وفى الحالتين ساكت لا بنساك ولا عايز أنساك

قالوا أن اللى بحب بجد لو فاضى بيه من اللى بحبه
ميحبش بس ميكرهش
وأنا فاض بيا تعبت بجد قد ما بتعب لا كرهتك
ولا عارف حتى مبحبكش
--------------------------------------

اجمل الكلمات مكتوبة بالاحمر

الدين المعاملة

سبحانك لا اله الا انت انى كنت من الظالمين

اتصرفت تصرف انا غير راضى عنه ....كان نفسى اعمل زى ماهو مكتوب فى الاية...انا ماتصرفتش وحش,,,بس برضوا مش حلو,,,يعنى موقفى ماكنش موقف هجوم....بس كان نفسى يكون موقفى زى ماهو مكتوب و زى ماهو المفروض انه يحصل...ربنا يعفو عنا جميعا و يلهمنا من عنده التصرف الصح

انا نقلت الاية بالتفسير بتاعها...ياريت نحاول نتصرف كده...ياريت

قَوْله تَعَالَى " اِدْفَعْ بِاَلَّتِي هِيَ أَحْسَن "

أَيْ مَنْ أَسَاءَ إِلَيْك فَادْفَعْهُ عَنْك بِالْإِحْسَانِ إِلَيْهِ كَماَ قَالَ عُمَر رَضِيَ اللَّه عَنْهُ : مَا عَاقَبْت مَنْ عَصَى اللَّه فِيك بِمِثْلِ أَنْ تُطِيع اللَّه فِيهِ ..

وَقَوْله عَزَّ وَجَلَّ " فَإِذَا الَّذِي بَيْنك وَبَيْنه عَدَاوَة كَأَنَّهُ وَلِيّ حَمِيم "..(ولى حميم)اىَ الصَّدِيق

أَيْ إِذَا أَحْسَنْت إِلَى مَنْ أَسَاءَ إِلَيْك قَادَتْهُ تِلْكَ الْحَسَنَة إِلَيْهِ إِلَى مُصَافَاتك وَمَحَبَّتك وَالْحُنُوّ عَلَيْك حَتَّى يَصِير كَأَنَّهُ وَلِيّ لَك حَمِيم أَيْ قَرِيب إِلَيْك.

ادفع بالتى هى احسن.... كالغضب بالصبر والجهل بالحلم والإساءة بالعفو

....فإذا الذي بينك وبينه عداوة كأنه ولي حميم

أي فيصير عدوك كالصديق القريب في محبته إذا فعلت ذلك

و دى اية تانية,,,عشان الناس اللى بتكلم بعضها باسلوب وحش او طريقة غير لطيفة فيها نوع من الاساءة او نوع من

الاستهانة و التهكم و غيره من الحاجات اللى الشيطان بيزقها علينا فى وسط كلامنا او لما نتعصب و نتنرفز على بعض

وَقُلْ لِعِبَادِي يَقُولُوا الَّتِي هِيَ أَحْسَنُ إِنَّ الشَّيْطَانَ يَنْزَغُ بَيْنَهُمْ إِنَّ الشَّيْطَانَ كَانَ لِلْإِنْسَانِ عَدُوًّا مُبِينًا

يَأْمُر تَبَارَكَ وَتَعَالَى عَبْده وَرَسُوله صَلَّى اللَّه عَلَيْهِ وَسَلَّمَ أَنْ يَأْمُر عِبَاد اللَّه الْمُؤْمِنِينَ أَنْ يَقُولُوا فِي مُخَاطَبَاتهمْ وَمُحَاوَرَاتهمْ الْكَلَام الْأَحْسَن وَالْكَلِمَة الطَّيِّبَة فَإِنَّهُمْ إِنْ لَمْ يَفْعَلُوا ذَلِكَ نَزَغَ الشَّيْطَان بَيْنهمْ وَأَخْرَجَ الْكَلَام إِلَى الْفِعَال وَوَقَعَ الشَّرّ وَالْمُخَاصَمَة وَالْمُقَاتَلَة فَإِنَّهُ عَدُوّ لِآدَم وَذُرِّيَّته مِنْ حِين اِمْتَنَعَ مِنْ السُّجُود لِآدَم وَعَدَاوَته ظَاهِرَة بَيِّنَة

وَلِهَذَا نَهَى أَنْ يُشِير الرَّجُل إِلَى أَخِيهِ الْمُسْلِم بِحَدِيدَةٍ فَإِنَّ الشَّيْطَان يَنْزَغ فِي يَده أَيْ فَرُبَّمَا أَصَابَهُ بِهَا .

و قَالَ رَسُول اللَّه صَلَّى اللَّه عَلَيْهِ وَسَلَّمَ " لَا يُشِيرَنَّ أَحَدكُمْ إِلَى أَخِيهِ بِالسِّلَاحِ فَإِنَّهُ لَا يَدْرِي أَحَدكُمْ لَعَلَّ الشَّيْطَان أَنْ يَنْزَغ فِي يَده فَيَقَع فِي حُفْرَة مِنْ النَّار " أَخْرَجَاهُ مِنْ حَدِيث عَبْد الرَّزَّاق .

وَقَالَ الْإِمَام أَحْمَد : حَدَّثَنَا عَفَّان حَدَّثَنَا حَمَّاد أَنْبَأَنَا عَلِيّ بْن زَيْد عَنْ الْحَسَن قَالَ حَدَّثَنِي رَجُل مِنْ بَنِي سَلِيط قَالَ أَتَيْت النَّبِيّ صَلَّى اللَّه عَلَيْهِ وَسَلَّمَ وَهُوَ فِي أَزْفَلَة مِنْ النَّاس فَسَمِعْته يَقُول " الْمُسْلِم أَخُو الْمُسْلِم لَا يَظْلِمهُ وَلَا يَخْذُلهُ التَّقْوَى هَاهُنَا " قَالَ حَمَّاد وَقَالَ بِيَدِهِ إِلَى صَدْره " وَمَا تَوَادَّ رَجُلَانِ فِي اللَّه فَفَرَّقَ بَيْنهمَا إِلَّا حَدَث يُحْدِثهُ أَحَدهمَا وَالْمُحْدِث شَرّ وَالْمُحْدِث شَرّ وَالْمُحْدِث شَرّ ".

--------

ياريت لما واحد منا يتكلم مع واحد تانى يعرف انه بيكلم انسان زيه تمام...يعنى بيتأذى زيه تمام

انا مش هاطول فى الكلام مع ان فى كلام كتير نفسى اقوله..بس لانه كلام معروف كله مش هاطول

انا بس ندمان انى ماقابلتش الاساءة بالاحسان...اينعم ماقبلتهاش باساءة...بس بجد نفسى كنت اعمل صح الصح

يالا....ربنا يرزقنا جميعا حسن التصرف

سلطان زمانى

انا عايز اكتب اى حاجة.......بس مش عارف اكتب ايه....اصل انا فرحان,,,,هو مش فرحان بمعنى فرحان و مزقطت
انما حاسس انى اخر انبساط...زى ماتقولوا عامل دماغ,,,منفض لاى حد ممكن يكون مزعلنى,,,و مركز قوى مع كل انسان مفرحنى
و اكتشفت انه الحمد لله مافيش غير 2 او 3 بنى ادمين اللى فى بينى و بينهم خلاف(ده كلام بجد),,,و بعد  كده كل الناس اللى اعرفها علاقتى بيهم فل الفل...الحمد لله الحمد لله يعنى و  ماشاء الله  و خمسة و خميسة

النهاردة الصبح فعلا كنت متضايق...بجد بجد كنت متضايق اوى من حاجة تافهة...
بس لما فكرت اكتشفت انه تافه و مالوش لزمة ولا يمثل لى اى اهمية و مش يستاهل انى اشغل بالى بيه ...
فعلا.....موضوع تافه....تخيلته قدامى,,,و قلتله انت مش تستاهل انى اشغل بالى بيك و اقل من انى افكر فيك ....
و دلوقتى افتكرت اللى انا عملته و ازاى انا كنت متضايق و قرفان اوى و عمال افكر  انا غلطان والا لأ و ايه اللى عمل المشكلة.....
بعدها و من غير تفكير لقيت وشى عليه ابتسامه من الودن للودن....بجد ابتسامة عريضة...اكنى باقول للموضوع ده نفض لنفسك التنين....
باختصار تاكدت انى مش غلطان لما اخدت راى 2 من احسن الناس و قالولى يابنى كبر و ارمى من ورا ودنك...(تحسوا اللغة غريبة...مانا عامل هاى هيد بقى)
و بعدين لاقيتنى بافتكر فؤاد و هو بيقول
"
انا سلطان زمانى,,, طول عمرى فى مكانى
مهما الحب جانى..... بهرب بالهداوة
لا عيون معجبانى ولا رمش اسمرانى
هايلخبط كيانى..... ولا محتاج شقاوة

مش كل الشطاره راح تغلب سمارة
ولا نظره واشاره.... ولا حبه حلاوه
مالك بيا مالك خليكى فى حالك
مهم يكون جمالك.... دا انا اخر غناوة

وادي واحده تاني جايه تتحداني
وانا سلطان زماني.... واد أخر طراوه
قلبى اخر راحة والعيون سواحة
والحياة بصراحة .....من غيركم طرواة "

هى طبعا كان بيغنيها للبنات و كده....بس فيها نفس الاحساس اللى انا حسيته ناحة الموضوع ده...يعنى مهما كان حصل,,,,,هابعت احلى ودن (يعنى هانفض)

وشكر خاص للكنج فؤش
بس خلاص
:)))))))))))))))))

يوميات مواطن افندى

يوميات مواطن افندى.....الله اعلم اليوميات دى هاتفضل معانا هنا على طول والا لأ,,,بس عموما انا هاكتب يوميات الافندى ده النهاردة...و كلمة افندى مش معاناها انه من ايام زمان و ايام الالقاب و كده,,ده بس نوع من الاحترام للمواطن ده اللى شايل الهم و كاتم الغم و مستحمل .....وكل الكلام اللى احنا عارفينه

النهاردة,,,,اخينا خلص جامعته و لم عدته و جرى على محطة الاتوبيس على أمل انه يوصل البيت خلال ساعة او ساعة و شوية على الرغم انه لو روح موتورجل مش هاياخد اكتر من نص ساعة (فعلا...انا روحت معاه  قبل كده)...المهم,,اخيرا و بعد طول
انتظار دام اكتر من ساعة الا قليل عدى الاتوبيس على المحطة,,,
تحس انه الاتوبيس بيوزعوا فيه لحمة,,لا لا لحمة ايه ,,ده ولا اكنهم بيدوا شقة
و عربية للى يعرف يركب,,,,,قال امرى لله و جرى وسط الجموع و بطنه متقطعه من الجوع لانه صايم...المهم من غير ذكر تفاصيل بطولته فى ركوب الاتوبيس و حرفنته فى الشعلقة و اصراره على المواصلة فى مرحلة الحشر و التزنيق و جهاده عشان يفضل محتفظ بمكان يقف فيه برجل واحده و حتة فى الماسورة المصدية اللى فوقه يمسك فيها بايده....
المهم...ايمانا من عم المواطن باهمية دفع ثمن التذكرة لانه يظن بانها تساهم فى تعديل و تطوير و زيادة عنصرى الراحة و الامان فى وسائل النقل العام,,,شمر كمامه و بص قدامه شاف الكمسرى على مرمى البصر,,,طلع الربع جنيه و خبط على كتف اللى قدامه... واحد يافندم لو سمحت,,,الناس لسه بخير...بعد شوية وصلته التذكرة سليمة و كاملة و الحمد لله,,,و عشان احنا فى رمضان نبقى تخلصنا من باقى مخاطر النشل و الخناقات و خلافه

ندخل فى الجد بقى...بعد مدة طويلة اوى وصلت حوالى ساعة  ,,,نجح الاتوبيس فى الانتقال من امام جامعة القاهرة الى المنيل (رقم قياسى...فى التاخير طبعا)
و هو الاتوبيس داخل على القصر العينى...اذا بالسواق يفاجئ بسيارة طاااااائشة جدا كسرت قدامه و الدنيا زحمة جدا...
الظاهر حمادة اللى كان سايق العربية فاكر نفسه سواق ميكروباص ...و صوت فرملة و كل الركاب اتدلدقوا على بعض لقدام من اثر الفرملة...طبعا الركاب و منهم المواطن مستعجلين عايزين يروحوا...انما ازاى...عربية حمادة اتجرحت و الاكسدام الورانى وقع و بيعيط...طبعا...ماهى عربية اخر موديل....
حمادة طلع و بص للسواق و قعد يزعق لدرجة ان صوته الرقيق انجرح...ووقف الشارع من وراهم عشان خاطر حمادة
السواق يقوله ياعم انت اللى غلطان وسع من قدامى خلينى اطلع  بدل مانا سادد الشارع و حمادة راسه و الف سيف مايوسع,,,لازم عمو الظابط يجى و يضربك يا سواق و يقولك كده كخ...
جه الظابط...عاين موقع الحادثة....قال لحمادة يا استاذ حمادة انا مش عارف اقولك ايه....بس للاسف...العيب من حضرتك
جن جنون حمادة و ازاى و ليه يكون غلطان...طلع الموبايل من جيبه و كلم اونكل عزيز و اشتكاله قلة ادب ووقاحة الظابط
عمو عزيز كلم الظابط....الظابط فهمه ووضحله حمورية ابن اخته ...انما ازاى و ليه ده عزيز بيه
ما باليد حيلة....راح الظابط على السواق و قاله هات رخصك عشان نعمل محضر,,,,السواق قاله مش معايا رخصة,,,انا حكومة,,هاشيل رخصة ليه
خد الظابط الرخص بتاعت حمادة
عمو عزيز جه...شاف الحادثة...قال فى نفسه"الله يكسفك يا حمادة",,,,الحمد لله ,,,عمو عزيز راجل مهم انما........
اكيد مش هاقول انما عنده ضمير......راجل مهم انما يعرف سمكرية كتير.... بتصلح عربيات الناس اللى  كرشها كبير....زى عزيز بيه باشا بلوشى
خلصت القصة على ان عمو عزيز ركب عربيته و الظابط ركب الاكسدام بايده و بس...من غير مايكون مكسور ولا ملزوق...كده بس...بايده
مواطن افندى شاف كده اتنرفز و اتعصب و قال فى سره آه يا ابن الـ....اللهم انى صايم
يعنى موقف الشارع وراك بتاع ساعة الا تلت...عشان الاكسدام اتهز من مكانه ووقع....ولا عشان تعرفنا انك معاك موبايل و تعرف عمو عزيز....
ولا عشان كان نفسك السواق الغلبان ينزل يبوس جزمتك عشان تسيبه,,,والا الظابط يحلفلك انك انت اللى حمار و متخلف و غلطان,,,,,
والا عملت ده كله عشان انت فاضى و مش وراك حاجة قلت تعطل الحيوانات اللى فى الشارع المعفنين اللى ريحتهم وحشة من كتر الشغل........
دلوقتى بقى كل واحد يعرف اونكل عزيز او طنط عنايات هانم لازم يتنطط على خلق الله و يطلع الموبايل و يتصل بميت الف معرفه...حتى لو هو الغلطان......
هو فى نهاية المشكلة راح اخونا المواطن و سأل مستر حمادة على جنب و قاله انا شايفك ماشاء الله يعنى مش محتاج تعمل مشكلة ,,,و كمان السواق ده غلبان مش هايعرف يدفعلك اللى انت عايزه...قلى بامانة كنت عامل ده كله ليه
حمادة قاله بكر فخر و عنتزة...اصل انا عامل تامين على العربية و كنت عايز اعمل محضر عشان اخد التامين و اجدد العربية....!!!!!
هو اكيد اخونا المواطن فطر.... فى سره يعنى
-------------------------------------------------------------------
انا بس كنت عايز اشاور على حاجة موجودة و انا نفسى مانشفهاش...ربنا يسهل و حمادات البلد يسترجلوا و عنايات هانم و عمو عزيز يراعوا ربونا فى البونىادمين شوية

اخيرا و ليس اخرا....مش كل من مسك موبايل...يتقاله يا حمادة

مش عارف اعمل ايه

مش عارف اعمل ايه
اقوله والا ايه
انا بالى بيه مشغول
بس انا خايف على طول

بيقولوا خايف ليه
لو في مستنى ايه
خايف يكون ناسينى
و انا مستنى عليه

انا قلبى يا ناس فى حيرة
بين صبر و بين كلام
و كل يوم و ليلة
مبقاش عارف ينام

بيقولوا خايف ليه
لو فى مستنى ايه
خايف يبقى فراق
و انا ماقدرش عليه

انا قلبى يا ناس فى حيرة
بين صبر و بين كلام
دلونى اعمل ايه
انا قلبى ذنبه ايه

قالوا هو عامل ايه
بيفكر والا ايه
رديت اعرف ازاى
قالوا من نظرة عنيه

تانى يوم اول ماشفته...قمت و جريت عليه
و لقيت نظرة عيونه...سحر شاددنى ليه
و بدل ماشوف حالى
جرالى اللى جرالى
و الحيرة زادت اكتر
غنيت اعمل ايه

23.10.2004

من اقرب الاغانى الى قلبى و لها معزّة عندى
 

مش حاسس غيرك

مباتشى حاسس حد غيرك.......مهما كانوا قريبين
ولا حد احن عليا منك........مهما كانوا حنين

و الوقت لو مش معاك
ليك بحس بشوق و حنين
و اللحظة لو مش وياك
فعلا بتكون زى السنين

صدقنى
لو قلت انك ليا كل حاجة
لو قلتلك بحبك اكتر من اى حاجة

ولو طال عمرى سنين و سنين
هاعيشوا شوق اخلاص و حنين

و ده كله كلمتين
عاللى انا حاسو جوايا

بحبك اوى

09.09.2006

مستي حبيبى"حاجة كده خفيفة"من وحى اللحظة

حاسس....انى تعبان
لكنى.....فرحان لانى
مستنى اشوف حبيبى

و هو بعيد عنى
قلبى تايه منى
و هو قريب منى
قلبى طاير بيغنى
غنوة حب لحبيبى

ده هوه نور عنيا
اقرب من كله ليا
لو يوم هايغيب عليا
مش عايز اليوم ده يجى

زى آدم و حوا

زى ما ربنا خلق ادم و حوا
عشان يكونوا لبعضهم
بتمنى يكون خلقنا
عشان نكون لبعضنا
و زى ماكل حاجة فى الدنيا
نصيب و قسمة
باتمنى تكونى قسمتى
و زى ماكل واحد ليه دنيا
بتمنى تكونى دنيتى

كل واحد فى الحياة
ليه نص تانى بيدور عليه
و لما فى مرة بيلاقيه
يتمنى انه يحافظ عليه
و انا لقيتك من زمان
باتمنى انى احافظ عليكى
و لقيت فيكى الحنان
باتمنى انى املى عنيكى
-----------------------
ماعرفتش اكمل البتاعة دى بقالى سنة و شوية فقلت اكتبها كده و خلاص
15.04.2007